ଭୁବନେଶ୍ବର, ୧୦|୮ (ନି.ପ୍ର): ସୁଭଦ୍ରା ଯୋଜନାରେ ମହିଳାଙ୍କୁ ୫୦ ହଜାର ଟଙ୍କା ଭାଉଚର ଦେବା ପାଇଁ ବିଜେପି ତାର ନିର୍ବାଚନ ଇସ୍ତାହାରରେ ପ୍ରତିଶୃତି ଦେଇଥିବା ବେଳେ ସରକାରକୁ ଆସିଲା ପରେ ସ୍ଵଧୀନତା ଦିବସରେ ଏଥିପାଇଁ ମାନକ ପରିଚାଳନା ବ୍ୟବସ୍ଥା (ଏସଓପି) ଆଣିବାକୁ ଯାଉଛି | ସୁଭଦ୍ରା ଯୋଜନାରେ ହିତାଧିକାରୀ ମନୋନୟନ ପାଇଁ ଏକ ମାନଦଣ୍ଡ ଅଣାଯିବ | ଯୋଜନାରେ କିଏ ପାଇବେ ଏବଂ କିଏ ପାଇବେନି ତା’ର ଚିତ୍ର ସ୍ପଷ୍ଟ ହେବ | ଏସଂକ୍ରାନ୍ତରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ସୂଚନା ଦେଇଛନ୍ତି | ସୁଭଦ୍ରା ଯୋଜନା ପାଇଁ ଆଧାରକାର୍ଡ ହିଁ ଯଥେଷ୍ଟ | ତେବେ ଉଚ୍ଚବର୍ଗର ଲୋକ ଏଥିରୁ ବାଦ ପଡ଼ିପାରନ୍ତି | ଯେଉଁମାନେ ଆୟକର ଦେଉଛନ୍ତି ସେମାନଙ୍କୁ ସରକାର ବାଦ ଦେଇପାରନ୍ତି | ଅଗଷ୍ଟ ୧୫ ରେ ଏସଓପି ଆସିବା ପରେ ସୁଭଦ୍ରା ଯୋଜନା ନେଇ ଚିତ୍ର ଆହୁରି ସ୍ପଷ୍ଟ ହେବ ବୋଲି ଉପ ମୁଖ୍ୟ ମନ୍ତ୍ରୀ ଶ୍ରୀମତୀ ପରିଡା କହିଛନ୍ତି | ସେ କହିଛନ୍ତି ଯେ, ସୁଭଦ୍ରା ଯୋଜନା ବଜେଟରେ ୧୦ ହଜାର କୋଟି ଟଙ୍କା ଥିଲେ ମଧ୍ୟ ଆବଶ୍ୟକ ପଡିଲେ ଏହା ବଢାଯାଇପାରେ | ସେପ୍ଟେମ୍ବର ୧୭ ରେ ରାଜ୍ୟରେ ଏହି ଯୋଜନା ଲାଗୁ ହେବ | ରାଜ୍ୟରେ ଯେମିତି ଲକ୍ଷପତି ଦିଦିଙ୍କ ସଂଖ୍ୟା ବଢିବ ସେନେଇ ତାଙ୍କ ସରକାର କାମ କରୁଛି | ମିଶନ ଶକ୍ତି ମା ମାନଙ୍କୁ ଦୁବାଇ ବୁଲାଇ ନେଲେ ସେମାନଙ୍କ ବିକାଶ ହୋଇଯିବ ନାହିଁ | ମିଶନ ଶକ୍ତି ମା’ମାନେ କିପରି ଅଧିକ ଦକ୍ଷତା ସହିତ କାର୍ଜ୍ୟ କରିବେ ସେଥିପ୍ରତି ଗୁରୁତ୍ବ ଦିଆଯାଉଛି | ପୂର୍ବତନ ସରକାର ମିଶନ ଶକ୍ତି ମା’ମାନଙ୍କୁ ସ୍କୁଟି ଦେଇ ଥିବାବେଳେ ସେମାନେ ଏନେଇ ପସ୍ତାଉଛନ୍ତି | ଗତ ସରକାର ସେମାନଙ୍କ ଉପରେ ଋଣ ଭାର ବଢାଇ ଦେଇଛି | ବିଜେପି ମା’ମାନଙ୍କୁ କେବେବି ଭୋଟବ୍ୟାଙ୍କ ଭାବେ ବ୍ୟବହାର କରେନାହିଁ | ବିଜେପି ସେମାନଙ୍କ ବିକାଶ ଉପରେ ଅଧିକ ଗୁରୁତ୍ବ ଦେବ | ମିଶନ ଶକ୍ତି କେବେବି ବନ୍ଦ ହେବ ନାହିଁ | ପର୍ଜ୍ୟଟନ ବିକାଶ ପାଇଁ ସରକାର ଅନେକ ପଦକ୍ଷେପ ନେଉଛନ୍ତି | ଗତଥର ଇକୋ ରିଟ୍ରିଟ୍ ରେ ଅନେକ ବାବୁଙ୍କ ବିନା ପଇସାରେ ବିଳାସବ୍ୟସନ କଥା ସାମ୍ନାକୁ ଆସିଛି | ଏଥର ସେ ସବୁ ବନ୍ଦ ହେବ ବୋଲି ଉପମୁଖ୍ୟମନ୍ତ୍ରୀ କହିଛନ୍ତି |
